Տավուշի մարզպետի աշխատակազմ

Հուլիսի 23-ին Տավուշի մարզպետ Հովիկ Աբովյանն ընդունեց ՀՀ գյուղատնտեսության փոխնախարար Սամվել Գալստյանին: Հանդիպմանը ներկա էին մարզպետի տեղակալ Լևոն Սարգսյանը, մարզպետարանի գյուղատնտեսության ու բնապահպանության վարչության պետ Վաղարշակ Սուքոյանը և գյուղատնտեսության աջակցության մարզային կենտրոնի տնօրեն Վահան Կարապետյանը: Քննարկվեց 2014թ. կանխատեսվող գյուղատնտեսական մթերքների համախառն բերքի ծավալների /ըստ մշակաբույսերի/ ցուցանիշների, բերքահավաքի ընթացքի և առկա խնդիրների հարցը: 2014թ. հուլիսի 18-ին ՀՀ գյուղատնտեսության նախարար Սերգո Կարապետյանի Տավուշի մարզ կատարած աշխատանքային այցի ժամանակ սահմանագոտում գտնվող Չինարի գյուղի բնակիչները նախարարին էին դիմել համայնքում 5 հեկտարի վրա սերմնադաշտ հիմնելու նպատակով 1,5 տոննա <<բեզոստայա>> տեսակի էլիտար սերմացուի խնդրանքով: Փոխնախարարը նշեց, որ հարցը դրական լուծում է ստացել, և սահմանված ժամկետներում Շիրակի մարզի Գյումրու սելեկցիոն կայանից նշված սերմացուի խմբաքանակը կտեղափոխվի Չինարի և անվճար կտրամադրվի համայնքին: Քննարկվեց նաև 2014 թվականի աշնանացանի համար սերմացուների խմբաքանակի հարցը: Նշվեց, որ այս տարի համայնքների կողմից առաջին վերարտադրության սերմացուի պահանջարկը նախորդ տարվա 350 տոննայի դիմաց կազմում է 457 տոննա: Զուգահեռ քննարկվեց նաև աշնանացանի դիզվառելիքի և պարարտանյութերի ձեռքբերման գործընթացի հարցը: