Տեղեկատվական կենտրոն
Նորություններ
Քննարկվեց Սահմանադրական բարեփոխումների հայեցակարգը
21.07.2014
Հուլիսի 21-ին Տավուշի մարզպետարանում տեղի ունեցավ խորհրդակցություն, որտեղ քննարկվեց Սահմանադրական բարեփոխումների հայեցակարգը: Քննարկմանը մասնակցում էին մարզի տեղական ինքնակառավարման, իրավական, կրթական ու առողջապահական մարմինների, հասարակական կազմակերպությունների ներկայացուցիչներ: Խորհրդակցությունը վարեց ՀՀ Տավուշի մարզպետ Հովիկ Աբովյանը: Հայեցակարգով նախատեսված դրույթները ներկայացրին ՀՀ Նախագահին կից սահմանադրական բարեփոխումների մասնագիտական հանձնաժողովի անդամ Գևորգ Դանիելյանը և ՀՀ Նախագահի աշխատակազմի իրավաբանական վարչության պետ, Նախագահին կից սահմանադրական բարեփոխումների մասնագիտական հանձնաժողովի անդամ Գրիգոր Մուրադյանը: Խոսելով սահմանադրական բարեփոխումների անհրաժեշտության մասին՝ Գևորգ Դանիելյանն ասաց, որ սահմանադրության լավ կամ վատ շեշտադրումը չէ, որ կանխարոշում է սահմանադրական բարեփոխումների ընթացքը: Այլ փոխվել են ժամանակները, միջազգային զարգացումները, իրավական պատկերացումները և իրավական, արժեհամակարգային հակասություններից խուսափելու համար պետք է մտցնել սահմանադրաիրավական կարգավորումներ, որոնք կհստակեցնեն արժեքային հարաբերություններն ու լուծումներ կտան դրանց միջև առաջացող հակասություններին: Իրավական և սոցիալական պետության սկզբունքների կյանքի կոչման համար կարևորվեց սահմանադրաիրավական մեխանիզմների ճիշտ ներդրման անհրաժեշտությունը: Կարևոր հանգամանք համարվեց նաև համայնքների խոշորացման մեխանիզմը, որը նույնպես պետք է կազմակերպվի սահմանադրական դրույթներով և որը կնպաստի ՏԻՄ-երի ամրապնդմանը: Բանախոսը ներկայացրեց նաև հանրաքվեի հետ կապված մի քանի հարցադրում: Թե որքանով են ներկայումս անհրաժեշտ սահմանադրական բարեփոխումները, այդ մասին հանգամանորեն խոսեց Գրիգոր Մուրադյանը՝ բաժին առ բաժին ներկայացնելով սահմանադրական բարեփոխումների նախագիծը: Խորհրդակցության ավարտին հանձնաժողովի անդամները պատասխանեցին ներկաներին հետաքրքրող հարցերին, լսեցին նրանց առաջարկները հայեցակարգի վերաբերյալ: