Տեղեկատվական կենտրոն
Նորություններ
Կողբում օծվեց նորակերտ Սբ. Հովհաննես եկեղեցին
02.06.2014
2014 թվականի հունիսի 1-ին Տավուշի մարզի Կողբ համայնքում օծվեց նորակերտ Սբ. Հովհաննես եկեղեցին: Օծման արարողությանը ներկա էր Հայաստանի Հանրապետության նախագահ Սերժ Սարգսյանը:
Եկեղեցու բացումը տոնի էր վերածել գյուղի օրը: Սուրբ արարողությանը ներկա էր ոչ միայն ամբողջ գյուղը, այլև բազմաթիվ հրավիրյալներ, հազարավոր հյուրեր հեռու ու մոտ վայրերից: Օծման արարողությունը կատարվեց Տավուշի թեմի առաջնորդ Տեր Եզնիկ արքեպիսկոպոս Պետրոսյանի հանդիսապետությամբ, որին էլ հաջորդեց առաջին Սբ. Պատարագը: Սբ. Հովհաննես եկեղեցու օծման ավարտին հյուրերը մասնակցեցին բարերարի կողմից կազմակերպված հյուրասիրությանը:
Նշենք, որ սրբավայրը գտնվում է իշխող բարձրության վրա: Աստծու այս հոյակերտ տան շինարարությունն սկսվել է մոտ երեք տարի առաջ գյուղի նվիրյալ զավակ, Տավուշի նորանշանակ մարզպետ Հովիկ Աբովյանի նախաձեռնությամբ ու բարերարությամբ: Եկեղեցին նախագծել է մեր հայրենակից, ճանաչված ճարտարապետ Միսակ Մելքումյանը: Տուֆակերտ կառույցը կենտրոնագմբեթ է, հատակագծումը 12x10-ի վրա է, զանգակատունը՝ 6x6-ի, շինության բարձրությունը խաչի հետ միասին կազմում է 28 մետր: Եկեղեցու ներսը զարդարում են երկու հիանալի որմնանկար՝ կատարված հանրահայտ սրբանկարիչ Անդրանիկ Անտոնյանի ձեռքով: Եկեղեցուն կից կառուցված է նաև հովվատուն: