Տավուշի մարզպետի աշխատակազմ

   Սիրելի տավուշցիներ, Հայրենական մեծ պատերազմի ու Արցախյան ազատամարտի սիրելի վետերաններ, զինվորներ ու սպաներ, ջերմորեն շնորհավորում եմ Ձեզ Մայիսի 9-ի՝ Հաղթանակի ու խաղաղության տոնի առթիվ: Մայիսը հայ ժողովրդի համար հաղթանակների ամիս է, իսկ մայիսի 9-ը՝ կրկնակի հաղթանակի տոն: 1945 թվականի մայիսի 9-ին գերմանական ֆաշիզմի դեմ տարած հաղթանակը ձեռք բերվեց նաև հայ ժողովրդի հերոս զավակների արյան ու մաքառումի գնով: Շատերը զոհվեցին այդ պատերազմում, մյուսները վերադարձան հերոսի կոչումով, մարտական շքանշաններով, մեդալներով ու պարգևներով: Ու քանի տարի էլ անցնի, պատերազմը երբեք չի մոռացվի, և միշտ անթեղված կրակի պես կորստյան ցավը կմխա մեր սրտերում: Բայց եթե չլինեին պատմությունից մեզ հասած հերոսական օրինակները, այսօր գուցեև չլինեին մերօրյա հերոսները, որոնք կարողացան անսասան պահել անկախ Հայաստանի սահմանները, ազատագրել Շուշին ու Արցախի շրջանները:
  Շուշիի ազատագրումը նոր փայլ ու իմաստ հաղորդեց խաղաղության տոնահանդես դարձած Հաղթանակի օրվան: Այն հայ ժողովրդի համար ոչ միայն ռազմական մեծ հաղթանակ էր, այլև պատմական, ազգային, հոգևոր-մշակութային արժեքների վերադարձ: Ու այս բոլոր ձեռքբերումների մեջ իրենց ուրույն տեղն ու դերն ունեն մեր նոր գոյամարտի ծնունդ հերոսները` երկրապահները: Հատկապես սահմանամերձ Տավուշի մարզում երբեք չի մոռացվի, թե ինչպես ադրբեջանական գրոհայինները 1990 թվականից սկսեցին զինված հարձակումներն Արցախում և Ադրբեջանի հետ Հայաստանի սահմանի ողջ երկայնքով: Այդ ժամանակ էր, որ ինքնաբուխ հայրենասիրությամբ ծնունդ առան հայ աշխարհազորայինների առաջին կամավորական ջոկատները, որոնք Հայաստանի սահմաններում մարտնչում էին թվական մեծ գերակշռություն ունեցող և անհամեմատ լավ զինված հակառակորդի դեմ: Ու պատահական չէ, որ մեր տոնացույցում ավելացավ ևս մեկ մայիսյան տոն` Երկրապահի օրը, որ նշվում է մայիսի 8-ին:
  Սիրելի հայրենակիցներ, մեկ անգամ ևս շնորհավորելով Մեծ հայրենականում տարած հաղթանակի 69-րդ տարեդարձի, Երկրապահի օրվա և Շուշիի ազատագրման 22-ամյակի կապակցությամբ, մաղթում եմ Ձեզ քաջառողջություն, մեր երկրի սահմաններին՝ հարատև խաղաղություն, ժողովրդին՝ բարօրություն ու բարեկեցություն: