Տեղեկատվական կենտրոն
Նորություններ
Արծվաբերդցի պատանիները դարձյալ 2-րդ տեղում էին
08.05.2014
Տավուշի մարզի սահմանամերձ Արծվաբերդի միջնակարգ դպրոցի թիմը /զինղեկ` Գուրգեն Զարգարյան/ «Նախնական զինվորական պատրաստություն» առարկայական հանրապետական օլիմպիադայի եզրափակիչ փուլում, որն անց է կացվել մայիսի 7-ին ՀՀ պաշտպանության նախարարության Վազգեն Սարգսյանի անվան ռազմական ինստիտուտում, գրավել է երկրորդ պատվավոր տեղը: Նշենք, որ արծվաբերդցի պատանիներն արդեն երկրորդ տարին է 2-րդ տեղ են գրավում օլիմպիադայում` զիջելով միայն Արցախի թիմին: Երրորդ տեղում Լոռիի ներկայացուցիչներն էին:
Պատանիների ֆիզիկական, կրակային և շարային պատրաստվածությանն անձամբ ծանոթանալու և անցկացվող մրցումներին հետևելու նպատակով ռազմական ինստիտուտ է այցելել պաշտպանության նախարար Սեյրան Օհանյանը: Ողջունելով օլիմպիադայի մասնակիցներին` պաշտպանական գերատեսչության ղեկավարն ընդգծել է երիտասարդ սերնդին հայրենասիրական ոգով դաստիարակելու կարևորությունը, հավաստիացրել, որ հպարտ է նման պատանիներով, քանի որ նրանք են զինված ուժերի ապագա զինվորներն ու հայրենիքի սահմաններն անառիկ պահողները:
Օլիմպիադայի փակման արարողությանը հանրապետական օլիմպիադայի արդյունքներով լավագույն ճանաչված թիմերը արժանացել են մրցանակների: Տավուշի մարզը ներկայացնող թիմի անդամները պարգևատրվել են մեդալներով և նվերներով: