Տավուշի մարզպետի աշխատակազմ

ՀՀ փոխվարչապետ, տարածքային կառավարման նախարար Արմեն Գևորգյանի 2014թ. մարզային խորհրդակցությունների շարքը մեկնարկեց Տավուշի մարզից: Հունվարի 20-ին Տավուշի մարզպետարանում անցկացված խորհրդակցության ընթացքում ամփոփվեցին մարզում 2013թ. կատարված աշխատանքները և ներկայացվեցին 2014թ. ծրագրերն ու անելիքները: Խորհրդակցությանը մասնակցում էին մարզպետ Արմեն Ղուլարյանը, մարզպետի տեղակալները, մարզպետարանի աշխատակազմի ղեկավարը, մարզպետարանի աշխատակազմի ստորաբաժանումների, մարզի քաղաքային համայնքների ղեկավարները, ինչպես նաև Տարածքային կառավարման նախարարության պատասխանատուներ: Օրակարգում հետևյալ հարցերն էին.
• Մարզային զարգացման ծրագրերի կատարման ընթացքի ներկայացում
• 2013թ. մարզում իրականացված կապիտալ ծրագրերի արդյունավետությանը վերաբերող հարցեր
• 2013թ. իրականացված և 2014թ. իրականացվելիք վարչական հսկողության գործընթացին առնչվող հարցեր
• 2013թ. մարզի տարածքում իրականացված ստուգումների արդյունքների ամփոփում
• 2013թ. գյուղատնտեսության ոլորտի ամփոփում և 2014թ. նախատեսվող աշխատանքների կազմակերպմանն առնչվող հարցեր
• 2013թ. հանրակրթական դպրոցների գործունեության ամփոփում և 2014թ. արդյունավետ գործունեությանն առնչվող հարցեր
• 2013թ. առողջապահական հիմնարկների գործունեության ամփոփում և 2014թ. արդյունավետ գործունեությանն առնչվող հարցեր
• Ինֆոտեխնոլոգիաների բնագավառում 2013թ. իրականացված աշխատանքներ և 2014թ. կանխատեսումներ
• 2013թ. համայնքներում սեփական եկամուտների հավաքագրման ցուցանիշներին առնչվող հարցեր
• 500.0 հազ. դրամ և ավելի հողի ու գույքի հարկի, ինչպես նաև վարձակալության գծով պարտավորություններ ունեցող իրավաբանական և ֆիզիկական անձանցից գումարների գանձման գործընթացին առնչվող հարցեր
• Համայնքների 2014 թ. բյուջեների կազմման և հաստատման գործընթացին առնչվող հարցեր
• 2014թ. հունվարի 1-ի դրությամբ համայնքների աշխատակազմերում ձևավորված աշխատավարձերի պարտքերին առնչվող հարցեր
• Համայնքներում 2008-2012թ.թ. մատուցված ծառայություններին վերաբերող հարցեր
• Համայնքային ծառայության բնագավառի խնդիրներ
Նշվեց, որ 2013 թ. մարզի համայնքների բյուջեների կատարողականը կազմել է 99.2 %: 2012 թ. համեմատությամբ ընդամենը եկամուտների ցուցանիշն աճել է 8.2 %-ով կամ 182,7 մլն դրամով: Հողի հարկի հավաքագրումը կատարվել է 90.7 %-ով, գույքահարկինը` 107.8 %-ով: Փոխվարչապետն ընդհանուր առմամբ դրական գնահատելով ցուցանիշները` միաժամանակ ներկաների ուշադրությունը հրավիրեց հողի հարկի հավաքագրումների տվյալների վրա` նկատելով, որ թերի հավաքագրումներից առաջին հերթին տուժում է հենց համայնքային բյուջեն:
Ա. Գևորգյանն առանձնահատուկ անդրադարձավ խոշոր հարկատուների կողմից հողի հարկի, գույքահարկի և վարձակալության մասով ունեցած պարտավորությունները ժամանակին կատարելու հարցին: Նշվեց, որ հունվարի 10-ի դրությամբ հողի հարկի և գույքահարկի մասով միայն խոշոր հարկատուների ունեցած պարտավորությունը կազմում է 8,7 մլն դրամ: Փոխվարչապետը ներկաներին և, մասնավորապես, համայնքների ղեկավարներին հորդորեց գործնական քայլեր ձեռնակել, որպեսզի հատկապես խոշոր հարկատուների կողմից համայնքի նկատմամբ ունեցած ֆինանսական պարտավորություններն ամբողջությամբ կատարվեն և անթույլատրելի համարեց պարտքերի առկայությունը:
Առանձնահատուկ անդրադարձ եղավ համայնքային սեփականություն հանդիսացող գյուղատնտեսական նշանակության վարելահողերի վարձակալության տրամադրման ընթացակարգերին: Փոխվարչապետը կարևորեց նշված ընթացակարգերի պարզեցումը, ինչպես արվել էր արոտավայրերի վարձակալության պարագայում:
Փոխվարչապետին զեկուցվեց նաև, որ մարզի համայնքներում արդեն ավարտվել է 2014թ. բյուջեների կազմման գործընթացը: Մարզպետարանի պատասխանատուները նշեցին, որ անհրաժեշտ մեթոդական աջակցություն ցուցաբերվել է համայնքներին, կազմվել են բավականին իրատեսական ֆինանսական փաստաթղթեր:
Ա. Գևորգյանը խորհրդակցությանը ներկա համայնքների ղեկավարներին առաջարկեց հետևողական լինել բյուջեների ամբողջական կատարման հարցում, ինչը հնարավորություն կտա ապահովել նախատեսված ծրագրերի իրականացումը:
Քննարկվեցին նաև մարզպետարանի և համայնքային ենթակայության հիմնարկներում իրավապայմանագրային ընթացիկ խնդիրների հետ կապված հարցեր: Ա. Գևորգյանն առաջարկեց սեղմ ժամկետներում ավարտել անհրաժեշտ աշխատանքներն ու պայմանագրերի կնքման գործընթացը` հաշվի առնելով, որ կառավարությունն արդեն հաստատել է համապատասխան որոշումները, ինչպես նաև հորդորեց հետևողական լինել, որպեսզի աշխատավարձերի վճարումների ուշացումներ չլինեն:
Խորհրդակցության ընթացքում ներկայացվեց նաև համայնքների աշխատակազմերի աշխատակիցների առավելագույն թվաքանակի մոդելը, որը մշակվել է Տարածքային կառավարման նախարարության կողմից` հիմք ընդունելով բնակչության թիվը:
Տվյալներ ներկայացվեցին նաև տեղեկատվական տեխնոլոգիաների ներդրման ուղղությամբ մարզի համայնքներում կատարված աշխատանքների մասին: Նշվեց, որ Համայնքային կառավարման տեղեկատվական համակարգ (ՀԿՏՀ) է ներդրված մարզի 62 համայնքներից 29-ում, 22 համայնք ունի նաև էլեկտրոնային փաստաթղթաշարժի հնարավորություն: Փոխվարչապետը հորդորեց ակտիվ աշխատանքներ իրականացնել այդ ուղղությամբ` տեղեկատվական տեխնոլոգիաների ներդրումն ու կիրառումը կարևոր համարելով ինչպես աշխատանքների արդյունավետության, այնպես էլ թափանցիկության տեսանկյունից:
Օրակարգային մյուս հարցը վերաբերում էր կառավարության կողմից գյուղատնտեսության աջակցության ծրագրերի իրականացմանը: Փոխվարչապետին զեկուցվեց, որ ամփոփվել է 2014թ. համար մարզի հողօգտագործողների` պարարտանյութի, դիզվառելիքի, սերմացուի պահանջարկը, և համապատասխան տվյալները կներկայացվեն կառավարություն:
Խորհրդակցությանը տեղեկություններ ներկայացվեցին 2013թ. մարզում տարբեր ծրագրերով իրականացված աշխատանքների մասին: Նշվեց, որ ընդհանուր առմամբ կատարվել է ավելի քան 26 մլրդ դրամի ներդրում, որոնցից 21,5 մլրդ դրամը` քաղաքաշինության, 840,5 մլն դրամը` ճանապարհաշինության, 810 մլն դրամը` ջրամատակարարման, 1 մլրդ դրամը` գազիֆիկացման, 2 մլրդ դրամը` դրենաժային ցանցի կառուցման բնագավառներում: Փոխվարչապետն անդրադառնալով կապիտալ ծրագրերին` հատկապես ընդգծեց ճանապարհաշինական ծրագրերի ժամանակին իրականացման կարևորությունը` հարցն առաջնահերթ համարելով Իջևանի եւ Բերդի տարածաշրջանի համայնքների տրանսպորտային հաղորդակցության ապահովման տեսանկյունից:
Փոխվարչապետը մարզպետարանի պատասխանատուներին և համայնքների ղեկավարներին հորդորեց նաև ամենայն աջակցություն ցուցաբերել Դիլիջան քաղաքի զարգացման ծրագրերի իրականացմանը: