Տավուշի մարզպետի աշխատակազմ

   Երեկ աշխատանքային այցով Տավուշի մարզում էր ՀՀ տրանսպորտի և կապի նախարար Գագիկ Բեգլարյանը: Տավուշի մարզպետ Արմեն Ղուլարյանի ուղեկցությամբ նախարարն այցելեց Վազաշեն-Պառավաքար ճանապարհի վտանգավոր տեղամասը շրջանցող` նոր կառուցվող ճանապարհահատված, ծանոթացավ այստեղ իրականացվող աշխատանքների ընթացքին: Նշենք, որ 3,2 կիլոմետր երկարությամբ ճանապարհի նախագծանախահաշվային փաստաթղթերը մշակվել են <<Ճաննախագիծ ինստիտուտ>> ՍՊԸ-ի կողմից: Շինարարական աշխատանքներն իրականացնում է <<Իջևանի ՃՇ>> ՓԲԸ-ն: Ներկայումս վերականգնված է 1600 գծամետր հատվածի հողային պաստառը: Դրան զուգահեռ իրականացվում են արհեստական ու ինժեներական կառուցվածքների տեղադրման, ժայռային հատվածներում պայթեցման նախապատրաստական աշխատանքներ: Շինարարական աշխատանքներում ներգրավված են անհրաժեշտ քանակությամբ ճանապարհաշինական մեքենա-մեխանիզմներ և սարքավորումներ: Նախատեսված է երկշերտ ասֆալտբետոնե ծածկով երթևեկության համար ապահով ու անվտանգ ճանապարհահատված: Նախարարը տեղում զրուցեց ինժեներատեխնիկական անձնակազմի հետ, մոտիկից ծանոթացավ իրականացված աշխատանքներին: Նախարարին զեկուցեցին, որ աշխատանքներն ընթանում են սահմանված կարգով և կավարտվեն նախատեսված ժամանակում:
  Ներկայումս Իջևան-Բերդ տրանսպորտային կապը իրականացվում է և նախկին գործող ճանապարհով, և 51,5 կմ երկարությամբ Իջևան-Գանձաքար-Իծաքար-Բերդ ճանապարհով, որը Իջևան-Բերդ տրանսպորտային կապի համար համարվում է այլընտրանքային անվտանգ երթևեկելի ճանապարհ: Այս ճանապարհի 34,5 կիլոմետրը կոպճային է: Այժմ այստեղ կոպճային ծածկի բարելավման նպատակով իրականացվում են 3 ոլորանների պայթեցման ու լայնացման, ծածկի հարթեցման, առանձին հատվածներում թափվածքների մաքրման աշխատանքներ: