Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
ՆԱ ՄԵԾ ԷՐ ԱՎԵԼԻ, ՔԱՆ ԵՂԱՎ
21.12.2012
Ապրողների պարտքն է հիշել անցյալի երախտաշատ գործիչներին, ովքեր ուղի են հարթել գալիք սերունդների համար, դարձել ուղենիշ և անանց օրինակ: Նրանցից մեկն էլ ազգային-ազատագրական պայքարի քաջամարտիկ, մեծ հայագետ ու թարգմանիչ, գրող ու հասարակական գործիչ, մանկավարժ ու հոգևորական, Հյուսիսային Կովկասում Հայաստանի Հանրապետության անդրանիկ դեսպանորդ Հակոբ Սառիկյանն է, ով սերում է Տավուշի մարզի Գանձաքար գյուղից: Մեծ երախտավորի ծննդյան 140-ամյակին նվիրված հանդիսավոր միջոցառում էր կազմակերպվել Տավուշի մարզպետարանում, որին մասնակցում էին աշխատանքի ու պատերազմի վետերաններ, ազատամարտիկներ, մտավորականներ ու ուսանողներ: Մինչ միջոցառումն սկսելը մասնակիցները հնարավորություն ունեցան դիտելու նիստերի դահլիճի նախասրահում բացված ցուցահանդեսը` Հակոբ Սառիկյանի մասին պատմող փաստագրական նյութերով ու լուսանկարներով: Հանդիսավոր միջոցառումն սկսվեց Իջևանի սբ. Ներսես Շնորհալի եկեղեցու հոգևոր հովիվ Տեր Սիմեոն քահանա Առաքելյանի աղոթքով, որից հետո բացման խոսքով հանդես եկավ Տավուշի մարզպետ Արմեն Ղուլարյանը: Այնուհետև գրող, հրապարակախոս Ռուբեն Սիմոնյանը, ով տարիներ շարունակ պեղել է Տավշո աշխարհի տարեգրության էջերը, մոռացությունից փրկել բազմաթիվ անուններ ու վավերագրեր, ներկայացրեց մեծ հայրենասերի ու մտավորականի կյանքն ու գործունեությունը, ում անունը նույնպես տարիներ շարունակ անհայտության մեջ է եղել ու մոռացության տրված շատերի համար:
