Տեղեկատվական կենտրոն
Նորություններ
Ամենամյա օգոստոսյան խորհրդակցությունում
29.08.2012
Օգոստոսի 29-ին Տավուշի մարզպետարանում տեղի ունեցավ մարզի մանկավարժների օգոստոսյան խորհրդակցությունը, որը վարում էր ՀՀ Տավուշի մարզպետի տեղակալ Լևոն Սարգսյանը: Խորհրդակցությանը մասնակցում էին ՀՀ կրթության և գիտության փոխնախարար Մանուկ Մկրտչյանը, ՀՀ կրթության ազգային ինստիտուտի փոխտնօրեն Անահիտ Բախշյանը, ինստիտուտի մասնագետներ, գնահատման և թեստավորման կենտրոնի ներկայացուցիչներ:
Մարզի դպրոցների նախորդ ուսումնական տարվա ամփոփ տվյալները, ինչպես նաև գալիք ուսումնական տարվա անելիքները ներկայացրեց Տավուշի մարզպետարանի աշխատակազմի կրթության, մշակույթի և սպորտի վարչության պետ Աշոտ Փաշինյանը: Մասնավորապես Աշոտ Փաշինյանն անդրադարձավ մարզի դպրոցների աշակերտների թվին, առարկայական օլիմպիադաներում մեր մարզի ներկայացուցիչների մասնակցությանը և 2006 թվականից Տավուշի մարզում ներառական կրթության ներդրման և այդ ուղղությամբ իրականացվող ծրագրերին:
Հանրակրթության ոլորտում տեղի ունեցող փոփոխությունների, ինչպես նաև համակարգի զարգացման հետագա խնդիրների մասին պարզաբանումներով հանդես եկավ ՀՀ կրթության և գիտության փոխնախարար Մանուկ Մկրտչյանը:
Նա իր խոսքում մասնավորապես անդրադարձավ էքստեռն քննությունների կազմակերպման գործընթացին, խոսեց մարզում ներառական կրթության հաջողությունների և կրթական ոլորտում իրականացված բարեփոխումների մասին:
Առաջիկա ուսումնական տարվա առթիվ իրենց հուզող հարցերի, խնդիրների մասին ելույթներ ունեցան մարզի դպրոցների տնօրենները: