Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
Ռումինիայի քաղաքապետերը` Տավուշի մարզում
27.10.2011
Եռօրյա աշխատանքային այցով Հայաստանի Հանրապետությունում են գտնվում Ռումինիայի Պիտեշտ, Ֆոկշան, Ռոման, Գեռլա, Դումբրավեն, Ֆրումոասա քաղաքների քաղաքապետեր Թուդոր Պենդիուկը, Բոգդան Մատիշանը, Լաուրենցիու Լեորեանուն, Օվիդիու Դրագանը, Ջորջետա Իրիմիեն, Տիբոր Ֆերենցը: Նրանց Տավուշի մարզպետարանում ընդունեց մարզպետ Արմեն Ղուլարյանը: Հանդիպմանը ներկա էին նաև Տավուշի մարզի քաղաքային համայնքների ղեկավարները:
Մարզպետ Արմեն Ղուլարյանը ողջունելով հյուրերին, նշեց որ ուրախ է ընդունելու նման պատվիրակության և հույս հայտնեց, որ ճանաչողական այցը կտա նաև գործնական արդյունք` դառնալով համագործակցության հիմք: Ապա մարզպետը հյուրերին ներկայացրեց Տավուշի մարզն իր աշխարհագրական դիրքով, տնտեսության ոլորտներով և դրանց զարգացման հեռանկարներով:
Ռումինիայի քաղաքպետերը հայտնցին, որ իրենց համար մեծ պատիվ է լինել Հայաստանում, քանի որ հայ ժողովուրդը մեծ ավանդ ունի իրենց քաղաքների կառուցման ու զարգացման գործում:
Գեռլա և Դումբրավեն քաղաքների ղեկավարները տեղեկացրին, որ 18-րդ դարի սկզբին իրենց քաղաքները հիմնել են հենց հայերը և դրանք երկար ժամանակ կառավարվել են հայկական օրենքներով: Այսօր էլ այս քաղաքներում առկա է հայկական հարուստ մշակութային ժառանգություն` քաղաքային հոգևոր և աշխարհիկ շինությունների, արվեստի գործերի, գիտապատմական հետաքրքրություն ներկայացնող արժեքավոր արխիվների ու իրերի տեսքով:
Հանդիպման ընթացքում երկու կողմերի միջև քննարկում ծավալվեց համագործակցության հնարավոր ոլորտների վերաբերյալ, նախանշվեցին քաղաքների միջև բարեկամական կապեր հաստատելու հնարավոր տարբերակները: Պայմանավորվածություն ձեռք բերվեց նաև Տավուշի մարզի և ռումինական Արջես տարածաշրջանի միջև գործնական կապեր հաստատելու մասին:
