Տավուշի մարզպետի աշխատակազմ

 Տավուշի մարզում էր ՀՀ աշխատանքի և սոցիալական հարցերի նախարար Արթուր Գրիգորյանի գլխավորած աշխատանքային խումբը, որի կազմում էին նախարարության կառուցվածքային և առանձնացված ստորաբաժանումների ղեկավարներ: Տավուշի մարզպետարանում նրանց ընդունեց մարզպետ Արմեն Ղուլարյանը: Այցի ծրագիրը ներառում էր հիմնականում երկու հարց. առաջինը`քաղաքացիների ընդունելություն և երկրորդը`  հանդիպում մարզի համայնքների ու սոցիալական ծառայությունների ղեկավարների հետ: Նպատակը մեկն էր.  առաջին հերթին հենց տեղում լսել քաղաքացիներին և ընդհանրացված ձևով վեր հանել այն խնդիրներն ու լուծում պահանջող հարցերը, որոնք առկա են մարզում, այնուհետև ոլորտի մարզային պատասխանատուներին ներկայացնել համակարգում եղած հիմնահարցերն ու փոփոխությունները: Նախապես տեղեկացված լինելով նախարարի այցի մասին` բազմաթիվ քաղաքացիներ էին գրանցվել ընդունելության համար: Աշխատանքի և զբաղվածության, հաշմանդամության, նպաստների ու ավանդների, կենսաթոշակի և այլ հարցերով դիմած քաղաքացիների համար Տավուշի մարզպետարանում նախապես առանձնացված աշխատասենյակներում ընդունելություն կատարեցին նախարարության համապատասխան ստորաբաժանումների ղեկավարները: Քաղաքացիներից շատերը դիմել էին իրենց սոցիալական իրավունքների իրացման հետ կապված հարցերով, ոմանք էլ պարզապես տեղեկատվություն և պարզաբանում ստանալու նպատակով էին եկել ընդունելության: Եղան քաղաքացիներ էլ, ովքեր ցանկություն հայտնեցին խոսել անձամբ նախարարի հետ: Գերատեսչության ղեկավարը ընդունեց բոլորին և սպառիչ պատասխան տվեց բարձրացված հարցերին: