Տեղեկատվական կենտրոն
Նորություններ
ՍԱՀՄԱՆԱՄԵՐՁ ՄՈՎՍԵՍՈՒՄ ՕԾՎԵՑ ՆՈՐԱԿԱՌՈՒՅՑ ԵԿԵՂԵՑԻՆ
10.08.2011
![](http://tavush.mtad.am/files/n_pics/161_s.jpg)
ՍԱՀՄԱՆԱՄԵՐՁ ՄՈՎՍԵՍՈՒՄ ՕԾՎԵՑ ՆՈՐԱԿԱՌՈՒՅՑ ԵԿԵՂԵՑԻՆ
Տավուշի մարզի սահմանամերձ Մովսես գյուղում տոնական տրամադրություն էր. ամբողջ գյուղը, Հայաստանում ու Հայաստանից դուրս ապրող հարյուրավոր մովսեսցիներ ու հյուրեր մեկտեղվել էին` մասնակցելու գյուղում կառուցված Սուրբ Աստվածածին եկեղեցու բացման հանդիսավոր արարողությանը: Ավելի քան 200 հոգի ժամանել էր միայն Մոսկվայից, շատերը եկել էին ամբողջ ընտանիքով: Միջոցառմանը ներկա էր Տավուշի մարզպետ Արմեն Ղուլարյանը: Աստծո տան բացումը հավատավոր ժողովրդի համար օրը վերածել էր տոնախմբության: Չէ որ այսուհետ նրանք հնարավորություն կունենան ապրելու լիարժեք հոգևոր կյանքով, Հայ Առաքելական եկեղեցուն հատուկ կարգով նշելու Ծնունդ, Կնունք, Պսակադրություն:
Ճարտարապետական հետաքրքիր լուծումներով նորակառույց եկեղեցու հովանավորը մոսկվայաբնակ բարերար Վազգեն Վանեսյանն է, ով հոգու ամուր թելերով կապված է իր հայրենի բնօրրանին, ուրախանում է նրա ձեռքբերումներով ու մտահոգվում խնդիրներով, աշխատում հնարավորինս աջակցել դրանց լուծմանը: Ճարտարապետ Ալեքսանդր Դանիելյանի նախագծով կառուցված եկեղեցու շինարարական աշխատանքներն իրականացրել է Թովմաս Պապյանը: 11 մետր լայնություն, 15,3 մետր երկարություն և 21 մետր բարձրություն ունեցող հոյակերտ այս շինությունը կենտրոնագմբեթ է, տանիքի հարավ-արևմտյան լանջին տեղադրված է զանգակատունը:
Եկեղեցու բացման արարողությունն սկսվեց Պատարագով և Oծման սբ. կարգով, որը կատարեց Հովակիմ Եպիսկոպոս Մանուկյանը Մայր Աթոռ սբ. Էջմիածնից Տավուշի թեմի առաջնորդական տեղապահ Տ. Թորգոմ վարդապետ Տոնիկյանի մասնակցությամբ: Օծմանը հաջորդեց նորաբաց եկեղեցու սբ. Մկրտության առաջին արարողությունը. մկրտվեց Վանեսյանների ընտանիքը: Կատարվեց նաև մատաղի օրհնության կարգ: Միջոցառման բոլոր մասնակիցների համար կազմակերպվել էր նաև հյուրասիրություն: Օրն ավարտվեց տոնական համերգով` նախ հոգևոր, այնուհետև` հանրապետության հանրաճանաչ երգիչ-երգչուհիների կատարմամբ: