Տավուշի մարզպետի աշխատակազմ

 Հերթական խորհրդակցությունն աշխատանքների ընթացքը քննարկելու նպատակով

  Տավուշի մարզպետ Արմեն Ղուլարյանը հերթական խորհրդակցությունն էր հրավիրել, որի ընթացքում քննարկվեց ՀՀ կառավարության 2011 թվականի փետրվարի 3-ի  թիվ 108-Ն որոշմամբ Տավուշի մարզպետարանին հատկացված գումարների հաշվին մարզի դպրոցներում, համայնքային կենտրոններում իրականացվող աշխատանքների ընթացքը: Մասնակցում էին համապատասխան դպրոցների տնօրենները, համայնքների ղեկավարները, շինարարություն իրականացնող կազմակերպություններն ու նախագծողները: Վերոհիշյալ որոշմամբ Տավուշի մարզպետարանին հատկացվել է 632 մլն դրամ, որից 297,6 մլն դրամը տրամադրվել է դպրոցաշինության ոլորտին /Դիլիջանի Թախտա թաղամասի տարրական դպրոցի վերակառուցում, Իջևանի թիվ 5 դպրոցի, Գանձաքարի դպրոցի, Աղավնավանքի դպրոցի, Բերդի արհեստագործական դպրոցի, Չորաթանի դպրոցի, Նոյեմբերյանի թիվ 2 դպրոցի, Բերդավանի դպրոցի, Ոսկեվանի դպրոցի, Հաղարծնի դպրոցի վերանորոգում/, իսկ 96 մլն դրամ տրամադրվել է Կիրանցի համայնքային կենտրոնի կառուցման և  Նավուրի, Հովքի համայնքային կենտրոնների վերանորոգման համար: 

  Մարզպետը մեկ առ մեկ հետաքրքրվեց  յուրաքանչյուր օբյեկտում ընթացող աշխատանքներով` տեղեկատվությունը լսելով և շինարարներից, և տվյալ կազմակերպության ղեկավարներից:  Մարզպետ Արմեն Ղուլարյանը մեկ անգամ ևս ընդգծեց, որ աշխատանքները պետք է ավարտել սահմանված ժամկետներում: Նրանց զգուշացրեց, որ շարունակեն սերտ աշխատել մարզպետարանի քաղաքաշինության վարչության հետ և  ընթացքում առաջացող խնդիրներն անպայման համատեղ քննարկեն: Դպրոցների տնօրեններին, համայնքների ղեկավարներին  զգուշացրեց, որպեսզի անձամբ հետևեն աշխատանքներին և մտահոգություն լինելու դեպքում  անմիջապես տեղեկացնեն:

  Խորհրդակցությունում քննարկվեց նաև ՀՄՀ Հայաստան ՊՈԱԿ-ի միջոցով Տավուշի մարզի համայնքներում  երրորդ կարգի ջրանցքների  վերականգնման ընթացքը: Մասնակցում  էին Աչաջրի, Լուսաձորի, Սևքարի, Կողբի, Արճիսի, Հաղթանակի, Մովսեսի ջրանցքների վերականգնման և Իջևան քաղաքի խմելու ջրի ներքին ցանցի վերակառուցման  շինարարական աշխատանքներն իրականացնող կազմակերպությունների ներկայացուցիչները, համայնքների ղեկավարներ: