Տպել
Տեղեկատվական կենտրոն
Նորություններ
Զենքեր գյուղացիներին` գայլերի դեմ պայքարելու համար
06.06.2011
Զենքեր գյուղացիներին` գայլերի դեմ պայքարելու համար
Դեռևս ապրիլի 29-ին Դեբեդավան համայնքից լուր ստացվեց, որ գայլը մտել է գյուղ և հոշոտել Արսեն Մովսիսյանին պատկանող 11 ոչխար: Սա առաջին դեպքը չէր, երբ գայլերը մոտենում էին բնակավայրերին ու վնասում ընտանի կենդանիներին` հսկայական վնաս պատճառելով դրանց տերերին: Իսկ գյուղացիները հաճախ չէին կարողանում պաշտպանվել, քանի որ չունեին համապատասխան զենք:
Խնդրի մասին տեղեկացվել էր Հանրապետության նախագահը: Որոշում էր կայացվել, որ մեծ թվով ոչխար ունեցող տնտեսություններին որսորդական զենք հատկացվի, որպեսզի նրանք կարողանան պայքարել գայլերի դեմ: ՀՀ նախագահի հանձնարարությամբ այդ անասնատերերը ընդունվել են ՙՈրսորդ՚ միություն և նրանց հատկացվել են որսորդական ժամանակակից զենքեր: Տավուշի մարզպետարանում, մարզպետ Արմեն Ղուլարյանը, Տավուշի մարզի ոստիկանության վարչության, մարզային ՙՈրսորդ՚ միության ներկայացուցիչները, համայնքների ղեկավարների ներկայությամբ, որսորդական հրացանները հանձնեցին Դեբեդավան համայնքից Արսեն Մովսիսյանին և Ռոբերտ Ասլանովին, Բագրատաշենից` Արամայիս Սարգսյանին, Պտղավանից` Հրաչյա Էվինյանին, Աչաջուր համայնքից` Արման Ալիխանյանին: Նրանց բացատրվեց զենքի օգտագործման ձևը, նրբությունները և ընդգծվեց , որ այն պետք է օգտագործել տեղին, ծառայեցնել նպատակին:
Տավուշի մարզպետարանի տեղեկատվության
և հասարակայնության հետ կապերի բաժին