Տավուշի մարզպետի աշխատակազմ

 

  Տարեվերջի կարևորագույն իրադարձություններից էր Վերահսկիչ պալատի խորհրդի վերջին նիստը, որը տեղի ունեցավ Տավուշի մարզպետարանում: Հայտարարվեցին դեռևս տարեսկզբին մարզի տարբեր ոլորտներում անցկացված ստուգումների արդյունքները: Օրակարգում երկու հարց էր. Տավուշի մարզպետարանին պետական բյուջեից հատկացված միջոցների օգտագործման և բյուջետային մուտքերի ապահովման, պետական սեփականության կառավարման և օգտագործման  վերահսկողության արդյունքները, ինչպես նաև համայնքներին պետբյուջեից հատկացված միջոցների   օգտագործման, համայնքային բյուջեի մուտքերի ապահովման  և համայնքային սեփականության կառավարման ու օգտագործման վերահսկողության արդյունքները: Իհարկե 62 համայնքներից դիտարկումներ էին կատարվել 14-ում` 4 քաղաքային և 10 գյուղական համայնքներում: Զեկուցումով հանդես եկան և ստուգումների արդյունքները մանրամասն  հայտարարեցին  Վերահսկիչ պալատի համապատասխան վարչությունների պետերը: Ըստ Վերահսկիչ պալատի նախագահ Իշխան Զաքարյանի, Տավուշի մարզում հայտնաբերված խախտումները գրեթե նույնն էին, ինչ մյուս մարզերում: Իհարկե, խախտումների ծավալների տարբերությամբ: Եվ ինչպես նույնպես նշվեց Վերահսկիչ պալատի նախագահ Իշխան Զաքարյանի կողմից, առաջին անգամն է  իրենց պրակտիկայում, որ մինչև Վերահսկիչ պալատի խորհրդի նիստն ու ամփոփիչ արդյունքները հայտարարելը հայտնաբերված խախտումների 60-70 տոկոսը արդեն վերացվել կամ շտկվել է: Այս մասին իր խոսքում հայտնեց նաև Տավուշի մարզպետ Արմեն Ղուլարյանը` նշելով, որ  հատկապես շինարարության ոլորտում հայտնաբերված ծավալային հավելագրումների դեպքերի հետևանքով պետական բյուջեին հասցված վնասների մեծ մասը վերականգնվել է` հիմնականում աշխատանքի, ինչպես նաև գումարը  պետական  բյուջե վերադարձնելու միջոցով:

Ինչպես հայտնեց Վերա-հսկիչ պալատի նախագահ Իշխան Զաքարյանը, մարզպետարանում անցկացված ստուգումների արդյունքում խախտումները կրկին հայտնաբերվել են  քաղաքաշինության ոլորտում, առողջապահության, սոցիալական ծառայությունների, մարզպետարանի ենթակայության ներքո գտնվող հողերը վարձակալությամբ տրամադրելու ոլորտներում: Նույն խախտումներն են նաև համայնքներում:

 Սոցիալական ծառայության բնագավառում նույնպես   առկա են կեղծ, անհիմն տեղեկանքներով մատուցվող  սոցիալական  ծառայությունների մասին:  Որպես դրական երևույթ նա նշեց այն, որ առաջին անգամ ստուգումների արդյունքում խորհրդի նիստում հաշվետվության  հաստատման հետ միասին արձանագրվեց նաև, որ ստուգման արդյունքում և ստուգումից հետո թերություններն ու խախտումները շտկվել են. ՙՍա ուրախալի է: Դա առաջին հերթին վերաբերում է քաղաքաշինության ոլորտին, որովհետև մենք խոսում ենք որոշ շինարարների անբարեխիղճ աշխատանքի մասին, և դրական է, որ անորակ շինությունների շտկումն իրականացվել է, չկատարված աշխատանքները կատարված են, իսկ ծավալային հավելագրումները ամբողջությամբ վերականգնված՚,- ասաց Իշխան Զաքարյանը: 

Նա տեղեկացրեց, որ Տավուշի մարզպետը մինչ հաշվետվության հաստատումը ընթացքում ծանոթացել է միջանկյալ արձանագրությունների և ՀՀ Վերահսկիչ պալատի հայտնաբերած խախտումներին, բավականին լուրջ կարգապահական տույժերի է ենթարկել դրանց կատարողներին. ՙՆիստի ընթացքում խոսվեց նաև աշխատանքից հեռացումների մասին: Իհարկե, սա մեր բնագավառը չէ, և մենք երբևէ խնդիր չենք դնում որևէ մեկին պատժելու: Սակայն  ինքնին երևութը դրական է այն առումով, որ եթե մարդիկ թույլ են տվել խախտում, չարաշահում, այնպիսի երևույթներ, որոնք հարիր չեն համայնքի ղեկավարին, կամ այլ պաշտոն զբաղեցնող անձին, ապա նրանք պետք է պատժվեն: Սա դաս կլինի նաև մյուսների համար՚,- ասաց ՎՊ նախագահը: 

Տավուշի մարզում իրականացված ստուգումների արդյունքով որևէ գործով ՀՀ Վերահսկիչ պալատը դատախազություն չի դիմելու, քանի որ քրեաիրավական բնույթի խախտումներ չեն հայտնաբերվել: Հայտնաբերված թերություններն ամբողջությամբ շտկելու ժամկետը 2011 թվականի մարտի  31-ն է, իսկ սոցիալական ծառայության տարածքային գործակալությունների հետ կապված գումարային վերականգնումների համար Տավուշի մարզպետ Արմեն Ղուլարյանի առաջարկով վերջնաժամկետը երկարաձգվեց  և նշանակվեց գալիք տարվա սեպտեմբեր ամիսը: