Տավուշի մարզպետի աշխատակազմ

Այսօր Տավուշի մարզի Իջևանի տարածաշրջանում մեկնարկեց 2023թ․ ձմեռային առաջին զորակոչը։ Զորակոչին ներկա էին Տավուշի մարզպետ Հայկ Ղալումյանը, փոխմարզպետ Արթուր Հովակիմյանը, ՀՀ ՊՆ զորակոչային և զորահավաքային համալրման ծառայության Տավուշի N 1 տարածքային ստորաբաժանման ղեկավար գնդապետ Կամո Հարությունյանը, այլ պաշտոնատար անձինք, զորակոչիկների ծնողներ ու հարազատներ։

Զորակոչիկներին խաղաղ և անփորձանք ծառայություն ու բարի վերադարձ մաղթեց Տավուշի մարզպետ Հայկ Ղալումյանը: Ողջույնի իր խոսքում մարզպետն անդրադարձավ նաև զինվորական ծառայության ու նորակոչիկների հետ կապված մի շարք ծրագրերի՝ ընդգծելով դրանց կարևորությունը բանակի հզորացման գործում:

Ներկայացրեց «Պաշտպան Հայրենյաց» ծրագիրը:

Ծրագրով ժամկետային պարտադիր զինծառայողը 6 ամիս ծառայելուց հետո կարող է 5 տարի ժամկետով դառնալ պայմանագրային զինծառայող, ստանալ մինչև 380 հազար ՀՀ դրամ աշխատավարձ և օգտվել պայմանագրային զինծառայողի բոլոր արտոնություններից։ Աշխատավարձերը կրկնապատկելու հնարավորություն պայմանագրային զինծառայողները կունենան, եթե ատեստավորում անցնեն։ Ժամկետային պարտադիր զինծառայողը 5 տարվա պայմանագրային զինվորական ծառայության, իր զեկուցագրի համաձայն, կարող է նշանակվել ինչպես իր բնակավայրին մոտ զորամասում, այնպես էլ իր ցանկությամբ նշանակվել այլ զորամաս կամ շարունակել ծառայությունը տվյալ /նախորոշված/ զորամասում:

Պայմանագրային զինվորական ծառայության 5 տարի ժամկետը լրանալիս ՀՀ Կառավարության որոշմամբ տրամադրվելու է նաև  5 միլիոն ՀՀ դրամ պարգևավճար, որը զինծառայողը կարող է տնօրինել ազատորեն:

Միջոցառման ավարտին Իջևանի համայնքապետարանի կողմից առաջին անհրաժեշտության պարագաներով փաթեթներ հանձնվեցին զորակոչիկներին: